Michnik reclama llibertá y verdá frente a la "malvada guerra" de Putin

"La guerra escontra Ucraína ye en realidá una guerra escontra tol mundu democráticu"

El periodista polacu Adam Michnik, Premiu Princesa d’Asturies de Comunicación y Humanidaes 2022, reivindicó güei la llibertá y la verdá como valores imprescindibles de la democracia, agora amenazaos por una "guerra malvada" y pola "criminal agresión" del réxime de Putin escontra Ucraína.

Fízolo nel discursu que güei pronunció en polacu énte los reis d’España y les sos fíes nel Teatru Campoamor d’Uviéu, onde recoyó un galardón que-y dieron por convertise nun "símbolu de la llibertá d’espresión y del humanismu, asina como un exemplu éticu de resistencia frente a les amenaces arbitraries".

Michnik (Varsovia, 1946), foi’l fundador y director del periódicu más importante de Polonia y ún de los más influyentes d’Europa central, Gazeta Wyborcza, un proyectu que "nació al empar que la democracia polaca", en 1989, y al que dedicó esti premiu.